ఎల్ నినో ఉపద్రవాన్ని అధిగమించడం ఓ సవాల్: సీఎం చంద్రబాబు

రాష్ట్రంపై ఎల్ నినో ప్రభావం తీవ్రంగా ఉండబోతోందన్న అంచనాల నేపథ్యంలో, ఈ ఉపద్రవాన్ని అధిగమించడం అధికార యంత్రాంగానికి ఒక పెద్ద సవాల్ అని ముఖ్యమంత్రి చంద్రబాబు అన్నారు. ఈ కష్టకాలంలో రైతులకు అన్ని విధాలా అండగా నిలవాలని, వారికి సరైన సమాచారం అందిస్తూ నష్టపోకుండా చూడాలని అధికారులను ఆయన ఆదేశించారు. ఎల్ నినో కార్యాచరణ ప్రణాళిక (యాక్షన్ ప్లాన్) అమలులో ఎలాంటి నిర్లక్ష్యాన్ని సహించబోమని ఆయన హెచ్చరించారు. మంగళవారం సచివాలయంలో ఎల్ నినో ప్రభావం, ప్రభుత్వ చర్యలపై ముఖ్యమంత్రి ఉన్నతస్థాయి సమీక్ష నిర్వహించారు.

ఎల్ నినో ఉపద్రవం..

ఈ సమీక్ష సందర్భంగా ముఖ్యమంత్రి మాట్లాడుతూ, "ఎల్ నినో ఉపద్రవాన్ని అధికార యంత్రాంగం మొత్తం ఒక సవాల్‌గా స్వీకరించి సమష్టిగా పనిచేయాలి. మంత్రి నుంచి క్షేత్రస్థాయి సిబ్బంది వరకు ప్రతి ఒక్కరూ బాధ్యతగా వ్యవహరించాలి. వరదలు, తుపానుల సమయంలో ఎలాగైతే అప్రమత్తంగా ఉంటామో, అదే రీతిలో ఇప్పుడు కూడా పనిచేయాలి" అని స్పష్టం చేశారు. మార్కెట్ కమిటీలు, నీటి సంఘాల సభ్యులను ఈ అవగాహన కార్యక్రమాల్లో భాగస్వాములను చేయాలని సూచించారు. 

వాతావరణ పరిస్థితులు, పంటల అధ్యయనం కోసం వ్యవసాయ విశ్వవిద్యాలయ విద్యార్థుల సేవలను వినియోగించుకోవాలని చెప్పారు. రైతు భరోసా కేంద్రాల (ఆర్ఎస్కే) స్థాయిలో ఇంప్లిమెంటేషన్ కమిటీలు ఏర్పాటు చేసి, సిబ్బందిని కన్వీనర్లుగా నియమించాలని ఆదేశించారు. ఇలాంటి విపత్కర పరిస్థితుల్లో డెయిరీ, ప్రకృతి వ్యవసాయాన్ని ప్రోత్సహించాలని, దీనివల్ల రైతులకు ప్రత్యామ్నాయ ఆదాయం లభిస్తుందని సీఎం సూచించారు.

ప్రతి పంటకు బీమా.. కలెక్టర్లదే బాధ్యత

రైతులను ఆదుకునేందుకు పంటల బీమా కీలకమని చంద్రబాబు అన్నారు. ప్రధానమంత్రి ఫసల్ బీమా యోజన, వాతావరణ ఆధారిత పంటల బీమా పథకాల కింద నమోదు ప్రక్రియ జూలై 31తో ముగియనుండగా, వరికి ఆగస్టు 15 వరకు గడువు ఉందని అధికారులు తెలిపారు. ఇప్పటివరకు 6.30 లక్షల హెక్టార్లలో పంటలు బీమా పరిధిలోకి వచ్చాయని వివరించారు. 

దీనిపై సీఎం స్పందిస్తూ.. "రాష్ట్రంలో సాగైన ప్రతి పంటకు కచ్చితంగా బీమా చేయించాలి. ఒక్క పంట నమోదు కాకపోయినా దానికి సంబంధిత జిల్లా కలెక్టర్లే పూర్తి బాధ్యత వహించాలి" అని తీవ్రంగా హెచ్చరించారు. అదేవిధంగా, రాష్ట్రంలో ఎక్కడా తాగునీటి సమస్య తలెత్తకుండా ముందస్తు చర్యలు తీసుకోవాలని ఆదేశించారు. పశుగ్రాసం కొరత లేకుండా చూడాలన్నారు. 

పర్యవేక్షణకు ప్రత్యేక కంట్రోల్ రూమ్

ఎల్ నినో ప్రభావాన్ని ఎప్పటికప్పుడు పర్యవేక్షించేందుకు రాష్ట్రస్థాయిలో ఒక ప్రత్యేక కంట్రోల్ రూమ్ ఏర్పాటు చేయాలని చంద్రబాబు ఆదేశించారు. "ఈ కంట్రోల్ రూమ్ ద్వారా వచ్చే డేటాను నిరంతరం విశ్లేషించాలి. ఆ విశ్లేషణల ఆధారంగా రైతులకు అవసరమైన సూచనలను రైతు భరోసా కేంద్రాల ద్వారా అందించాలి. ఏ ల్యాండ్ పార్శిల్‌లో పంటకు ఇబ్బంది ఉంది, అక్కడ బోరుబావి అందుబాటులో ఉందా, భూగర్భ జలాల పరిస్థితి ఏంటి అనే వివరాలతో రైతులకు సరైన మార్గనిర్దేశం చేయాలి" అని సీఎం అన్నారు. దీనివల్ల రైతులు అనవసరంగా పెట్టుబడి పెట్టి నష్టపోకుండా ఉంటారని ఆయన అభిప్రాయపడ్డారు. 

క్షేత్రస్థాయిలో విస్తృత అవగాహన.. ప్రత్యామ్నాయ పంటలు

ఆగస్టు 3 నుంచి రాష్ట్రవ్యాప్తంగా ఎల్ నినోపై రైతులకు అవగాహన కార్యక్రమాలు నిర్వహించాలని ముఖ్యమంత్రి ఆదేశించారు. వరికి బదులుగా తక్కువ నీటితో పండే ప్రత్యామ్నాయ పంటలైన కంది, ఆముదం, మినుము వంటి వాటిపై దృష్టి సారించేలా రైతులను ప్రోత్సహించాలని చెప్పారు. అత్యవసర విత్తన ప్రణాళికను సిద్ధంగా ఉంచుకోవాలన్నారు. 

ఎల్ నినో కారణంగా నిత్యావసరాలు, కూరగాయల ధరలు పెరగకుండా చర్యలు తీసుకోవాలని, ఇందుకోసం ప్రతి జిల్లాలో ఒకటి చొప్పున మొబైల్ రైతు బజార్లను ఏర్పాటు చేయాలని సూచించారు. ఈ మొబైల్ వాహనాలను రైతులు లేదా డ్వాక్రా మహిళలకు అప్పగించాలని సీఎం తెలిపారు. ఈ సమీక్షా సమావేశంలో మంత్రి అచ్చెన్నాయుడు, వ్యవసాయ శాఖ ఉన్నతాధికారులు, వ్యవసాయ శాస్త్రవేత్తలు పాల్గొన్నారు.